लग्नाचे आमिष देऊन शिक्षिकेची फसवणूक विश्वासघात आणि मन शान्तीचा भंग

अकोला जिल्हा प्रतिनिधी 

आशिष वानखडे

अकोला / मुर्तीजापुर – आजच्या डिजिटल युगात jivansathi.com सारख्या ऑनलाइन मॅट्रिमोनियल साईट्सवर लग्नासाठी नाती जोडणे सामान्य झाले आहे. मात्र, या विश्वासाच्या प्लॅटफॉर्मचा गैरवापर करून शिक्षिका आणि समाजाच्या नैतिक मूल्यांना धक्का पोहोचवणारी धक्कादायक घटना समोर आली आहे.

मुर्तीजापुर येथील 29 वर्षीय शिक्षिका योगिता जामनिक या व्यक्तीवर आरोपी स्वप्नील भिसे यांनी लग्नाचे स्वप्न दाखवत धोका दिला. आरोपीने प्रेमाचे नाटक करत 28 एप्रिल रोजी आपल्या जालना येथील घरी बोलावून शारीरिक संबंध प्रस्थापित केले, पण नंतर लग्नास संपूर्णपणे नकार दिला. या घटनेने फक्त शिक्षिकेच्या आयुष्याला नव्हे तर तिच्या सामाजिक प्रतिष्ठेला आणि आत्मविश्वासालाही धक्का बसला आहे.

सामाजिक वातावरणावर या प्रकारामुळे गंभीर परिणाम होत आहेत. महिलांवर होणाऱ्या अशा शोषणामुळे ऑनलाइन विवाहसाईट्सवरील नात्यांवर विश्वास कमी होत आहे. समाजात असुरक्षिततेची भावना वाढत असून, महिलांच्या सुरक्षिततेसाठी कठोर कायदे आणि प्रभावी पोलीस कारवाईची गरज अधोरेखित होते आहे.

मुर्तीजापुर पोलीस स्टेशन अंतर्गत महिला पोलीस हवालदार शालिनी सोळंके यांनी तत्परतेने गुन्हा नोंदविला आहे, तर तपास पोलीस उपनिरीक्षक आशिष शिंदे करीत आहेत. सदर प्रकरणाचा तपास पुढील न्यायालयीन कार्यवाहीसाठी जालना पोलीस ठाण्याकडे वर्ग करण्यात आला असून, आरोपीविरुद्ध कडक कारवाई करण्यासाठी पोलीस अधिकाऱ्यांकडून प्रयत्न सुरू आहेत.

या घटनेने समाजातील महिलांना फसवणूक आणि शारीरिक शोषण याविषयी जागरूक राहण्याचा संदेश दिला आहे. प्रत्येक स्त्रीने स्वतःच्या हक्कांसाठी आवाज उठवावा, तर समाजाने महिलांच्या सुरक्षिततेसाठी अधिक जबाबदारीची भूमिका पार पाडावी, अशी अपेक्षा व्यक्त केली जात आहे.