निवडणूक आयोगाच्या कार्यपद्धतीची निष्पक्ष चौकशी करा! समाजवादी पार्टीची राष्ट्रपतींकडे मागणी.

 निवडणूक आयोगाच्या कार्यपद्धतीची निष्पक्ष चौकशी करा! समाजवादी पार्टीची राष्ट्रपतींकडे मागणी.

आझाद पठाण यांच्या नेतृत्वात नांदुरा तहसील कार्यालयात निवेदन सादर; जिल्हाध्यक्ष सय्यद नफीस यांच्यासह पदाधिकारी व कार्यकर्त्यांची उपस्थिती

नांदुरा, दि. १२ ऑक्टोबर : निवडणूक प्रक्रियेतील पारदर्शकता, निष्पक्षता आणि उत्तरदायित्व सुनिश्चित करण्याच्या मागणीसाठी समाजवादी पार्टीच्या वतीने आज नांदुरा तहसील कार्यालयामार्फत राष्ट्रपती महोदया यांना निवेदन सादर करण्यात आले. मुख्य निवडणूक आयुक्त ज्ञानेश कुमार यांच्या कार्यपद्धतीबाबत उपस्थित करण्यात आलेल्या प्रश्नांची निष्पक्ष चौकशी करावी, अशी मागणी या निवेदनातून करण्यात आली.

समाजवादी पार्टीचे युवा जिल्हाध्यक्ष आझाद पठाण यांच्या नेतृत्वाखाली हे निवेदन देण्यात आले. लोकशाही व्यवस्थेत निवडणूक आयोगाची भूमिका अत्यंत महत्त्वाची असून, आयोगाच्या कामकाजात पारदर्शकता आणि निष्पक्षता असणे आवश्यक आहे. विरोधी पक्षांनी उपस्थित केलेल्या निवडणूकविषयक आक्षेपांची नियमानुसार दखल घेऊन त्यावर योग्य ती कार्यवाही करावी, अशी भूमिका निवेदनात मांडण्यात आली.

निवेदनात मुख्य निवडणूक आयुक्त ज्ञानेश कुमार यांच्या कार्यपद्धतीबाबत उपस्थित केलेल्या तक्रारींची चौकशी करणे, सर्व राजकीय पक्षांना निवडणूक प्रक्रियेत समान संधी मिळवून देणे आणि कोणताही नियमभंग किंवा अनियमितता आढळल्यास कायद्यानुसार कारवाई करणे, अशा प्रमुख मागण्या करण्यात आल्या आहेत. तसेच निवडणूक प्रक्रियेवरील जनतेचा विश्वास कायम ठेवण्यासाठी आवश्यक पावले उचलण्याचे आवाहन राष्ट्रपती महोदया यांना करण्यात आले.

पदाधिकारी व कार्यकर्त्यांची उपस्थिती

यावेळी समाजवादी पार्टीचे बुलढाणा जिल्हाध्यक्ष सय्यद नफीस, महिला जिल्हाध्यक्ष उमा ताई बोचरे, शेख नदीम, तोसीफ बिल्डर, मुशर्रफ शाह, अझर मिर्झा, तोसीफ खान, आसिफ खान, अक्रम खान, शेख अजीम, मोहम्मद सलीम, अयुब बेग, जमीर सहारा, मोहम्मद सोहेल राजा, शेख सय्यद बबलू यांच्यासह इतर पदाधिकारी व कार्यकर्ते उपस्थित होते.

लोकशाही मूल्यांचे संरक्षण, निवडणूक प्रक्रियेतील पारदर्शकता आणि मतदारांचा विश्वास दृढ करण्याच्या उद्देशाने समाजवादी पार्टीच्या वतीने हे निवेदन सादर करण्यात आले.