गणपती बाप्पाच्या आगमनाने नांदुरा शहर-ग्रामीण भाग भक्तिमय

 गणपती बाप्पाच्या आगमनाने नांदुरा शहर-ग्रामीण भाग भक्तिमय

‘गणपती बाप्पा मोरया’च्या जयघोषाने दुमदुमले शहर; गणेश मंडळांकडून आकर्षक सजावट व रोषणाई

*प्रतिनिधी:प्रकाश खंडागळे*

नांदुरा : विघ्नहर्ता गणरायाच्या आगमनाने नांदुरा शहरासह तालुक्यातील ग्रामीण भागात उत्साहाचे आणि भक्तिमय वातावरण निर्माण झाले आहे. ‘गणपती बाप्पा मोरया, मंगलमूर्ती मोरया’च्या जयघोषात विविध गणेश मंडळांनी तसेच नागरिकांनी लाडक्या गणरायाचे मोठ्या उत्साहात स्वागत केले.

गणेशोत्सवाच्या पार्श्वभूमीवर शहरातील विविध भागांमध्ये गणेश मंडळांकडून आकर्षक मंडप, विद्युत रोषणाई आणि सुंदर सजावट करण्यात आली आहे. अनेक मंडळांनी ढोल-ताशांच्या गजरात वाजत-गाजत गणरायाची मिरवणूक काढून विधिवत स्थापना केली. घरगुती गणपतींचेही भक्तिभावाने आगमन झाले.

गणेशमूर्ती खरेदीसाठी नागरिकांची बाजारपेठेत मोठी गर्दी पाहायला मिळाली. लहान मुलांपासून ज्येष्ठ नागरिकांपर्यंत सर्वांमध्ये गणेशोत्सवाचा उत्साह दिसून येत आहे. ग्रामीण भागातील गावांमध्येही गणेश मंडळांनी विविध धार्मिक, सांस्कृतिक तसेच सामाजिक उपक्रमांचे नियोजन केले आहे.

गणेशोत्सव काळात नागरिकांनी पर्यावरणपूरक पद्धतीने उत्सव साजरा करावा, तसेच कायदा व सुव्यवस्था राखण्यासाठी प्रशासनाला सहकार्य करावे, असे आवाहन करण्यात येत आहे. गणरायाच्या आगमनाने संपूर्ण नांदुरा तालुका ‘गणेशमय’ झाला असून, पुढील दिवसांत विविध धार्मिक व सांस्कृतिक कार्यक्रमांची रेलचेल पाहायला मिळणार आहे.